اذنات عليا المغرب وانا باقي تانتسنا الترونسبور في المحطة

السلام عليكم

كيف الحال جميع بخير

اتمنى ان تكونو في تمام الصحو والعافية

واحد الموقف وقع ليا في رمضان تقريبا هدي شي 12 سنة كنت باقي برهوش

المهم ندخلو في الاحداث

كنت في مدينة الرباط عند خالي وخاصني نرجع لمدينتي الجديدة ههه

سلا الجديدة فين ولينا ساكنين

وصلات العشية شي 16.00 انا غادي راجع بحالي للدار وعندي في جيبي 3 دراهم ديال طوبيس

وخوكم غادي تايتسركل ويدور ونسيت باللي منين تاتبقا شي نصف ساعة على الاذان ترونسبور تايتقطع

مشيت لمحطة طوبيس وخوكم ماعارف والو خخخ وتانتفاجئ بالطوبيسات ماكاينيش

قلت مع راسي نمشي لمحطة اخرى نشد طوبيس خور

قربات توذن على ما اعتقد ( كانت تاتودن مع 18.30 )

خوكم مريح ماعليه مابيه تايتسنا طوبيس ونا ماعلاباليش باللي راه سالاو طوبيسات وتقطعو الطاكسيات

انا باقي تانتسنى الطوبيس واحد الشوية اوهي تأذن (الله اكبر) بان ليا بنادم غادي تايجري لديروهم شي تايجري للمسجد

واحد خونا جاي هو وصاحبو في الموطور( سونطروا ) سمعو الاذان اوهوما يكسيريو

واحد الشوية تايبانو ليا طايرين في السماء الموطور في جيه وخوتنا في جيه

حادثة مروعة الشانطي كانت فيه عقبة وماشافوهاش

بنادم بان ليك جاي تايجري (الله اكبر الله اكبر) عيطو للاسعاف

انا واقف من البعيد تانشوف او مخلوع بان ليا الدم تايسيل من راس ديالو مول الموطور ونا نتخلع وهربت

ومشيت تانقلب في نفطر والمشكل دار ديال خالي بعيدة بزاااااااااف خاصها جبدا باش توصل

وخالي قال ليا منين توصل للدار عيط ليا

خوكم مخلوع من المنظر اللي شاف

ومن الفوق صايم وفيا جوع وخاصني نفطر وعندي في جيبي 3 درهم ماعندها مادير ليا , بقيت تانقول فين غادي نمشي

شنو غادي ندير دابا واش نعيط لخالي بهديك 3 دراهم ولا نشري بيها ماناكل

طاحت عليا واحد الفكرة قلت ارا نمشي فين خدام لواليد ونتسناه حتى يجي , والواليد ماغادي يجي حتى يصلي التراويح

وعاد يشد الطوبيس من سلا الى الرباط ماغادي يوصل حتى يلقاني تكوفرت وليت بحال شي جثة

مشيت لواحد الحانوت شريت 3 كرواسات ديبانيت بيهم ورجعت للمكان في خدام الواليد تانتسناه يجي

بقيت تانتسنا تانتسنا تانتسنا وتانتذكر الحادثة ومع خوكم غير وحدو بديت تانتخلع وطبت بالوقوف

وصلات شي 20.00 وتايبان ليا خالي جاي لعند الواليد للخدمة باش يسولو عليا واش وصلت للدار ولا لا

او هو يلقاني تانتسنا الواليد , قال ليا مالك مامشيتيش

وعاودت ليه البلان اللي وقع

وقال ليا علاش ماعيطتيش ليا , على الاقل كون رجعتي للدار تفطر معانا حتى لمور المغرب وشد طريق

وخوكم مع مصدوم من الحادثة ومخلوع

قلت ليه راه عيطت وماتايجاوب حد

قاليا راه تقلقنا عليك منين ماعيطتيش وراه عيطنا لمماك وقالت لينا ماجيتيش وقلت عنداك تكون وقعات ليك شي حاجة

صافي فديك الساعة عيط خالي للواليدة وقال ليها راه لقيتو

وداني فطرت في وحد المحلبة ومن تم داني ركبني في الطوبيس , وقال ليا منين توصل عيط ليا باش نطمائن عليك

كون هاني الخويل منين نوصل نعيط ليك

ووصلت للدار على خير وبخير والواليدة بقات تاتغوت هههه علاش ماعيتيش لينا

والواليدة راه المغرب اذنات والتيليبوتيكات سدو + فاش غادي نعيط

بدات الواليدة تاتسولني واش فطرتي ومشات مسكينة تاتوجد ليا الفطور

ومشات خبيرتي مع الواد الواد وبقيت انا مع ولاد الجواد

اتمنى ان تعجبكم هده الطرفة

تحياتي لكم

samiiiiiiiiiiiiiirrrrrrrr (samangel ab)

lol!